తెలంగాణ కధ ఇంకా ముగియలేదు.కేంద్రం వడివడిగా అడుగులు వేస్తున్నదని ప్రచారం జరుగుతున్నప్పట్టికీ, అనేకసార్లు తడబడుతున్నట్లుగా ఉంది.మొత్తం గందరగోళానికి తామే కారకులయ్యామన్న విమర్శల నడుమ కాంగ్రెస్ హై కమాండ్ తలపట్టుకుని కూర్చుంది.ఎప్పుడో జూలై ముప్పైన కాంగ్రెస్ వర్కింగ్ కమిటీ నిర్ణయం జరిగినా, దానికి అదే రోజు యుపిఎ ఆమోద ముద్ర పడినా, కేంద్ర క్యాబినెట్ కు ముందుకు తీర్మానం రావడానికి అక్టోబర్ మూడు వరకు పట్టింది.ఆ తర్వాత మరో అడుగు ముందుకు వేయడానికి మళ్లీ రెండు నెలలు పట్టింది. మధ్యలో రక్షణ శాఖ మంత్రి ఎకె ఆంటోని కమిటీని వేసినా అది ఏమి తేల్చలేకపోయింది.చివరికి రిపోర్టు ఇచ్చినట్లు ప్రచారం జరిగినా,దానిని ఆంటోనినే తిరస్కరించే పరిస్థితి దాపురించింది. ఆ తర్వాత మంత్రుల బృందం వ్యవహారాన్ని చేపట్టేసరికి మరో నెల గడిచిపోయింది. కేంద్రంలో ఎందరో మేధావులు ఉంటారని అంటారు.రాజ్యాంపరంగా అన్ని తెలిసిన విజ్ఞలు ఉంటారని భావిస్తారు.అన్నీ కాచి వడపోసిన మేధావులు కేంద్రాన్ని నడుపుతారని అంటారు.కాని తెలంగాణ విషయంలో జరిగిన పరిణామాలు చూస్తే మాత్రం మన దేశాన్ని ఈ తరహాలో పాలిస్తున్నారా అన్న సందేహం వస్తుంది.

రాష్ట్రం రెండు నివేదికల కారణంగా రావణాకాష్టంగా మారినట్లు అర్ధమవుతోంది. నమస్తే తెలంగాణ పత్రిక ఒక ఆసక్తికరమైన కధనాన్ని ఇచ్చింది. దాని ప్రకారం రెండువేల తొమ్మిది డిసెంబరు పందొమ్మిదో తేదీన ఆనాటి ముఖ్యమంత్రి రోశయ్య రాసిన ఒక నివేదిక కారణంగా కేంద్ర ప్రభుత్వం తన మనసు మార్చుకుని అంతకుముందు తెలంగాణ రాష్ట్ర ఏర్పాటుకు అనుకూలంగా చేసిన ప్రకటనను మార్చుకుని డిసెంబరు ఇరవైమూడో తేదీన మరో ప్రకటన చేసిందన్నది ఆ కధన సారాంశం.కేంద్ర హోం మంత్రి చిదంబరానికి రోశయ్య ఒక నివేదిక పంపుతూఆంద్ర,రాయలసీమ ప్రాంతాలలో చిదంబరం ప్రకటనకు నిరసనగా పెద్ద ఎత్తున ఉద్యమం చెలరేగిందని తెలిపారు. 2.25లక్షల మంది నిరసనలలో పాల్గొన్నారని, ఆంధ్ర,రాయలసీమలలో 1141 ఆందోళనలు జరిగాయని, వీటిలో ర్యాఈలు,ధర్నాలు,ఆమరణ నిరాహార దీక్షలు,రైల్ రకోలు, రాస్తారొకో తదితర కార్యక్రమాలు ఉన్నాయని వివరించారు.